ਜੰਗ ਤੋਂ ਬਾਅਦ !!

ਪਰਤਣਗੇ ਜਦੋਂ ਪੁੱਤ ,
ਜੰਗ ਤੋਂ ਬਾਅਦ |

ਗੱਲ੍ਹਾਂ ਦੀਆਂ ਲਾਲੀਆਂ ,
ਬਦਲ ਚੁੱਕੀਆਂ ਹੋਣਗੀਆਂ ,
ਅਖਾਂ ਦੀਆਂ ਲਾਲੀਆਂ ਵਿਚ |

ਰਖ ਕੇ ਚੇਹਰੇ ਤੇ ਮੁਸਕਾਨ ,
ਅੰਦਰ ਵੜ੍ਹ ਕਈ ਵਾਰ ਰੋਇਆ ਹੋਵੇਗਾ |

ਮੇਹਿਸੂਸ ਨਹੀ ਹੋਵੇਗਾ ਓਸਦਾ ਦੀਵਾਨਾਪਨ ,
ਓਸਦਾ ਪਿਆਰ ਕਿਸੇ ਹੋਰ ਦਾ ਹੋਇਆ ਹੋਵੇਗਾ |

ਪਰਤਣਗੇ ਜਦੋਂ ਪੁੱਤ ,
ਜੰਗ ਤੋਂ ਬਾਅਦ |

ਕੋਈ ਸਾਥੀ ਪੀ ਗਿਆ ਹੋਵੇਗਾ ,
ਸ਼ਹੀਦੀ ਜਾਮ |
ਰਹਿ ਗਿਆ ਹੋਵੇਗਾ ,
ਕਿਸੇ ਦੀ ਜੇਬ ਅੰਦਰ ,
"ਮਾਂ ਬੀਮਾਰ ਹੈ" ,"ਘਰ ਛੇਤੀ ਆਉਣ" ਦਾ ਪੈਗਾਮ |

ਕੁਝ ਆਉਣਗੇ ਘਰਾਂ ਨੂੰ , ਤਮਗਿਆਂ ਦੇ ਨਾਲ ,
ਕੁਝ ਆਉਣਗੇ ਕਦਮਾਂ ਚੋਂ ਇੱਕ ਕਦਮ ਗੁਆ ਕੇ |

ਕੁਝ ਆਉਣਗੇ ਸਿਤਾਰਿਆਂ ਵਾਲੇ ,
ਚਾਰ ਕੰਧਿਆਂ ਉੱਤੇ |

ਪਰਤਣਗੇ ਜਦੋਂ ਪੁੱਤ ,
ਜੰਗ ਤੋਂ ਬਾਅਦ |

ਰੱਤ ਨਾਲ ਰੰਗ ਧਰਤੀ ਨੂੰ ,

ਚੜਿਆ ਹੋਵੇਗਾ |

ਬਾਪੁ ਜਮੀਨ ਦੀ ਹਿੱਕ ਨਾਲ ,

ਚਿੰਬੜਿਆ ਹੋਵੇਗਾ |

ਮਾਂ ਦੀਆਂ ਅਖਾਂ ਹੋਣਗੀਆਂ ਦਰਵਾਜੇ ਉੱਤੇ ,

ਹਥ ਆਟੇ ਦੇ ਨਾਲ ਲਿਬੜਿਆ ਹੋਵੇਗਾ |

ਚੂੜੇ ਦਾ ਰੰਗ ਵੀ ਅਜੇ ਗੂੜਾ ਹੋਣਾ ,

ਪੁੱਤ ਦਾ ਖੂਨ ਮੰਗ ਤੋਂ ਨਿਖੜਿਆ ਹੋਵੇਗਾ |

ਗਾਉਣਗੇ ਗੀਤ ਪੰਛੀ ਆਜ਼ਾਦੀ ਦੇ ,

ਰੰਗ ਸੁਨੇਹਰੀ ਅੰਬਰ ਚ ਬਿਖਰਿਆ ਹੋਵੇਗਾ |

ਪਰਤਣਗੇ ਜਦੋਂ ਪੁੱਤ ,
ਜੰਗ ਤੋਂ ਬਾਅਦ |